ग्रामपंचायत बारूळ (Barul ) हे महाराष्ट्र राज्यातील धाराशिव जिल्ह्यातील तुळजापूर तालुक्यात वसलेले एक प्रगत, स्वच्छ व सुसंस्कृत गाव आहे. स्वच्छता, शिक्षण, आरोग्य व लोकसहभागाच्या माध्यमातून गावाने उल्लेखनीय प्रगती साधली आहे. ग्रामपंचायत व ग्रामस्थांच्या संयुक्त प्रयत्नांमुळे बारूळ गावाने “स्वच्छ व हरित गाव (Clean and Green Village)” म्हणून विशेष ओळख निर्माण केली आहे. हे गाव धाराशिव लोकसभा मतदारसंघात व तुळजापूर विधानसभा मतदारसंघात मोडते.

बारूळ गाव तुळजापूर शहरापासून सुमारे १७ कि.मी. अंतरावर असून जिल्ह्याचे मुख्यालय धाराशिवपासून सुमारे ४० कि.मी. अंतरावर आहे.
हे गाव ऐतिहासिक व सांस्कृतिक दृष्ट्या समृद्ध असून नळदुर्ग किल्ला हे जवळील प्रसिद्ध पर्यटनस्थळ आहे आणि तुळजापूर शहराच्या जवळ आहे आणि हे गाव तुळजापूरच्या धार्मिक आणि ऐतिहासिक परिसराचा एक भाग आहे.

२०११ च्या जनगणनेनुसार बारूळ गावाची एकूण लोकसंख्या २,४८२ इतकी असून गावात ५५९ कुटुंबे वास्तव्यास आहेत. गावाचा साक्षरता दर समाधानकारक असून शिक्षणाच्या बाबतीत गाव सतत प्रगती करत आहे.

गावात भव्य ग्रामसंसद भवन बांधण्यात आले असून या कार्यालयामार्फत आपले सरकार सेवा केंद्र चालवले जाते. या केंद्राद्वारे सर्व नागरिकांना वेळेवर संगणकीकृत दाखले व ऑनलाईन सेवा दिल्या जातात.

गावात हनुमान, विठ्ठल-रुक्मिणी आणि महादेव मंदिर ही प्रमुख धार्मिक स्थळे आहेत. स्मशानभूमीमध्ये वृक्ष लागवड, पिण्याचे पाणी, बाकडे व शेडची व्यवस्था करण्यात आली असून ते ठिकाण अत्यंत निसर्गरम्य आहे.

गावातील प्रत्येक घरात ओला व सुका कचरा वेगळा ठेवण्यासाठी दोन कचरा कुंड्या देण्यात आल्या आहेत.
अंगणवाडी व जिल्हा परिषद शाळांची रंगरंगोटी, डिजिटल शिक्षण प्रणाली, प्रोजेक्टर व सुंदर बेंचेस यांच्या साहाय्याने विद्यार्थी १००% उपस्थित राहून शिक्षण घेत आहेत.